FASHIZMI PROMOVOHET NË MAQEDONI

Publikuar në Dnevnik dhe Vest, 17 gusht 2012

Gjëma më e madhe në historinë e njerëzimit, fashizmi, ka përkrahësit e vet në Maqedoni, të cilët si askund tjetër në botë fituan mundësinë që ideologjinë e tyre të sëmurë dhe të lemerishme ta promovojnë në mediumet publike në Republikën e Maqedonisë.

Shpallja e përkujtimit për përvjetorin e vdekjes së Rudolf Hesit në të përditshmet Dnevnik dhe Vest (pjesë të grupacionit medial MPM) paraqet precedent të paparë në historinë e re botërore. Nuk besojmë se kudo në botë do të mund të publikohej një shpallje e këtillë.

Jemi të tmerruar nga madhërimi i njërës prej figurave më të errëta në historinë e njerëzimit, dorës së djathtë të Hitlerit, kriminelit Rudolf Hes.

Për ne është e qartë: për një publikim të këtillë personat përgjegjës duhet të shkojnë në burg. Kërkojmë hetime urgjente dhe ndëshkim të autorëve dhe personave përgjegjës për publikimin e këtij promovimi të neveritshëm të fashizmit.

CIVIL – Qendra për Liri

Është koha që të lidhemi

Jemi dëshmitarë të zhvendosjeve tektonike politike në sferën politike dhe sociale të vendit. Maqedonia është në gjendje të vlimeve të pandërprera tashmë një kohë të gjatë, gjë që ndikon drejtpërdrejt mbi zhvillimin e saj, gjendjen e të drejtave të njeriut, demokracinë dhe sundimin e së drejtës, pozicionimin ndërkombëtar dhe rajonal të vendit, si dhe mbi jetën e përditshme të qytetarëve.

Prania e sektorit civil në proceset me rëndësi esenciale për të tashmen dhe të ardhmen e Republikës së Maqedonisë është tepër e padukshme. Me këtë nuk duam të themi se organizatat e shoqërisë civile nuk punojnë sa duhet. Por, fragmentariteti dhe moskoordinimi çojnë drejt jetëshkurtësisë ose mungesës së efekteve dhe dukshmërisë së pamjaftueshme të ndryshimeve për të cilat angazhohen organizatat civile.

Është koha që kjo gjendje të ndryshojë.

Është koha që organizatat civile të ngrenë zërin dhe të tregojnë se nuk duhet të anashkalohen, porse duhet të gëzojnë respekt si një prej resurseve më të mëdha të vendit në këto kohë.

Është koha që organizatat qytetare të heqin dorë nga vendet formale nëpër komisione të rrejshme dhe të lidhen me njerëzit.

Është koha që të lidhemi dhe të punojmë bashkë në zgjidhjen e problemeve të përbashkëta për të mirën e të gjithë qytetarëve të Republikës së Maqedonisë.

Le t’i përballojmë dyshimet dhe kufizimet, le t’i bashkojmë forcat dhe kështu ta presim kohën e vlimeve edhe më të mëdha, të përgatitur, me kredibilitet, bartës të interesave dhe shpresave të të gjithë qytetarëve.